Республика жаңалықтары

13 Тамыз 2018 15:22
Білімді шәкірт, білікті маман - ЖОО айнасы

«Халықтың кемеліне келіп өркендеп өсуі үшін ең алдымен азаттық пен білім қажет»- деген екен Шоқан Шыңғысұлы Уәлиханов.

«Мен сендерді Интернет алмастыра алмайтын белсенді түрде жан-жақты дамуға, спортпен, өнермен айналысуға, шет тілдерді үйренуге, отандық және әлемдік әдебиеттің терең мұраларын танып-білуге шақырамын. Сендердің бәрің лайықты өмірдің, әл-ауқаттың, жаңа өмір сапасына қол жеткізудің тек еңбек арқылы ғана келетінін есте сақтауларың керек», - деді Президентіміз Н.Ә.Назарбаев студенттерге арналған үндеуінде. Елбасы «Қазақстан-2050» Стратегиялық Жолдауында да жастардың білімін басты назарға алып, олардың еш кедергісіз білім алып, кәсіби біліктіліктерін арттыруға үлкен үміт артып отырғанын байқауға болады. ҚР Президентінің ұлттық университеттерге жүктеген басты міндеті – әлемдік еңбек нарығында бәсекеге қабілетті мамандар даярлау. Міне, осы мақсатта елдегі ЖОО мен арнайы білім беру ошақтары түгелдей заманауй әдістемелермен толықтырылып, озық техникалармен жабдықталды. Солардың бірі - әл-Фараби атындағы ҚазҰУ. Бұл ЖОО ерекше мәртебесі бар Қазақстанның жетекші классикалық университеті, кәсіби жоғары оқу орнынан кейінгі білім мен ғылымды инновациялық дамытудың ұлттық көшбасшысы, еліміздің жоғары оқу орындары арасындағы бірінші Қазақстан Республикасы Президентінің «Сапа саласындағы жетістіктері үшін» сыйлығының иегері.

World University Rankings QS (Ұлы­британия) беделді рейтингтік агенттігі­нің зерттеу қорытындылары бойынша, әл-Фа­раби атындағы Қазақ ұлттық универ­ситеті әлемнің 250 үздік ЖОО-ның арасында 236-орынға көтерілген.

Халықаралық рейтингте универси­теттің табысты алға жылжуына заманауи талаптарға сай жүргізілген кешенді құ­рылымдық жаңарту ықпал етті. Нәтижеге бағытталған процестік менеджмент, бас­қару жүйесі және еңбекті рейтингтік ба­ғалау енгізілді. Сондай-ақ жоғары әлем­дік талап­тарға сай әрі халықаралық ак­кредитациядан өткен эксперименттік білім беру бағдарламалары дайындалды және енгізілді, ғылыми-зерттеу жұмыс­тары белсенді жүргізілуде.

Университет ректоры Ғалымқайыр Мұтанов атап көрсеткендей, мемлекеттік құрылымдар қатарында Қазақстан университеттері де елдің инновациялық жүйесінің үштік серпінін құруда өзінің зияткерлік орнын тауып, бәсекеге қабілетті мамандар ұстаханасын, жаңа білімдер мен инновацияларды өндіру орталықтарын күшейтуі қажет, сөйтіп, білімге негізделген экономиканың нақты нысанына айналуы тиіс. Нақты іс-қимылдар әл-Фараби атындағы Қазақ ұлттық университетінің қабырғасында белгілі дәрежеде жүзеге асып жатыр.

Университет әлемдік білім кеңістігінде интеграциялауға, жоғарғы білікті мамандарды даярлауға, өндіріске енгізілетін іргелі және қолданбалы зерттеулерді дамытуға бағытталған кең көлемдегі ғылым, білім, рухани-тәрбиелік, инновациялық және өндіруші негізіне ие.  Әл-Фараби атындағы ҚазҰУ  -де қолданбалы зерттеулер мен инновация өндірісі қалыптасып, үнемі даму үстінде, сонымен қатар университетіміз стартап жаңа компаниялардың құрылтайшылығын жүргізеді.

Әлемдік деңгейдегі зерттеу университеттері немесе жетілудің мына қағидаларына сүйенеді: зерттеудің сапасы мен нәтижелілігі; өз студенттерінің кәсіби даярлығының деңгейі; оқытушыларының біліктілігі; жұмылдырылатын қаржының көлемі және т.б. Іс жүзінде мұның барлығы бір модельге үйлеседі. Әл-Фараби атындағы ҚазҰУ-де «Университет — хаб» идеясы қалыптасып, дамып келеді. Бұл көпсалалы жүйе болып табылады, тіршілікке бейімді, ыңғайлы, бір жағынан жаһандануды екінші жағынан жергілікті жүйені ұстанатын модель болып танылады. Мұндай жүйе дамыған әлем мемлекеттерінің білім беру жүйесінде орын алады.

ҚазҰУ әлемнің 46 елінің ғылыми орталықтарымен және 400 жетекші университеттерімен жемісті еңбек етуде. Оқу орны БҰҰ-ның «Академиялық ықпал» бағдарламасының тұрақты даму бойынша жаһандық хабы және ЮНЕСКО – UNІTWІN-нің тұрақты даму бойынша аймақтық хабы болып табылады. ҚазҰУ – Орталық Азияда университет­тердің халықаралық консорциумына, Clіnton Global Іnіtіatіve Unіversіty университеттер желісіне және Жібек жолы университеттер альянсына қабылданған жалғыз университет. Бүгінде университетімізде Кембридж, Оксфорд, Гарвард, Стэнфорд, Йель және басқа да шетелдік жетекші ЖОО-лардың оқу бағдарламаларымен деңгейлес 230 бағдарлама енгізілген. Университет бағдарламаларының 90%-дан астамы халықаралық ASІІN, AQUІN, AQA, FІBAA сияқты агенттіктермен аккре­диттелген. Және әлемнің ең үздік университет­терімен қос дипломдық білім берудің 50-ден аса бағдарламасы жұмыс жасайды. Шетелдік университеттермен ынтымақтастық туралы келісім негізде магистрант, докторанттарға екі адамның жетекшілік ету тәжірибесі кеңінен өрістеп отыр. Бір ғылыми жетекші Қазақстаннан болса, екіншісі – шетел ЖОО-дағы белгілі ғалым. Осының бәрі де ҚазҰУ студенттері үшін халықаралық деңгейде оқып, зерттеулер жүргізуге лайықты жол ашады.

Қазақ Ұлттық университетінде «AL-FARABI UNIVERSITY SMART CITY» атты Қазақстан мен Орталық Азиядағы тұңғыш ғылыми-инновациялық жоба қолға алынып, іске асырылуда. Әл-Фарабидің әмбебап рухани құндылықтар негізінде құрылған «қайырымды қала» әлеуметтік идеал идеясы осы жобаның маңызды рухани-адамгершілік бастау-бұлағы болып табылады. Инновациялық жобаларға құштар, заман ағымынан қалмауға тырысатын студенттер үшін әр факультетте бизнес-инкубаторлар, университетте технопарк қызмет етеді.

Болашақ үздік мамандарын даярлауда Экономика және Бизнес Жоғары Мектебіндегі «Қаржы» кафедрасының алатын орны ерекше екенін атап өткен жөн. Еліміздің жетекші университеті студенттерінің кәсіби қалыптасуына, рухани дамуына ғана емес ғылыми-зерттеу жұмыстарына өз қалауымен, ынта жігерімен ат салысуы үшін факультет басшылығы, кафедра ұжымы тарапынан барлық жағдай жасалған. Болашақ қаржыгерлердің  бiрқалыпты даму ойларын жүзеге асыру бойынша G-Global тұғыры белсендi алаңға айналды. «Қаржы» кафедрасында «Қаржыгер» студенттер үйірмесі және қаржыгерлердің ғылыми студенттік ұйымы (ҚҒСҰ) қызмет етеді. Аталған үйірме мен ұйым студенттерді республикалық, халықаралық деңгейдегі олимпиадалар мен сайыстарға, сондай-ақ ҚазҰУ жыл сайын өткізетін «Фараби әлемі» атты халықаралық ғылыми-практикалық конференциясына даярлайды. «Фараби әлемі» конференцияның мақсаты – студенттердің ғылыми-зерттеу және оқу-танымдық қызметін ынталандыру, шығармашылық қабілеттерін ашу, барынша дарынды студенттер мен жас ғалымдарды іріктеу мен қолдау, олардың интеллектуалдық дамуына қолдау көрсету, ғылыми мәселелерді шешуге қатыстыру.
Кафедрада студенттердің өз алған білімдерін практикамен үйлестіруі «Биржалық трейдер» оқу орталығы ашылған. Оның негізгі мақсаты - бакалавр және магистратура студенттеріне әлемдік бағалы қағаздар нарығындағы биржа саудаларының негізін үйрету және электронды трейдингпен жұмыс істеу қабілетін арттыру.

«Қаржы» мамандығы «АРТА» тәуелсіз рейтингтік агенттігінің нәтижелері негізінде білім берудің магистратура  және бакалавриат бағыттары бойынша Республика деңгейінде жыл сайын алдыңғы орындарды иеленіп келеді. Кафедраның оқытушы-профессорлар құрамы еліміздің білім саласының үздік оқытушылары, өз ісінің майталмандары екені сөзсіз. Жоғары рейтінгті Thomson Reuters журналдарындағы қазақстандықтардың әрбір төртінші мақаласы ҚазҰУ ғалымдарының еңбектері.

Жалпы ЖОО – адамның тұлға болып қалыптасуына ықпал етіп, тұлғаның жан-жақты қабілетін ашып көрсетуіне мүмкіндік беретін мекен десек, әл-Фараби атындағы Университет осы үддеден шығып, ұлттың мүддесіне қызмет етіп жатқан, елдің болашағы үшін сапалы мамандар даярлап жатқан құтты мекен.

Университет студенттерінің өмірі қызықтылығымен, әр алуандығымен ерекшеленеді. Студенттік өмір деген тек дәрістер мен семинарларға қатысумен ғана шектелмейді. Олар шалқыған шығармашылық қуат пен жастық жалынды, балғын талантты шыңдайтын театр студиялары мен поэтикалық, пікірсайыс клубтарына, көңілді және тапқырлар сайысына белсене қатыса алады.

Спортпен айналысуға барлық жағдай жасалған (ҚазҰУ қалашығының спорт кешені, Студенттердің спорттық клубы, түрлі секциялар, денсаулық топтары). Қызметкерлер мен студенттердің спартакиадасы ұдайы өткізіліп, олардың қалалық жарыстарға қатынасуы қамтамасыз етіледі.

ҚазҰУ-ды еліміздің білікті мамандар ордасы, барлық жоғары білім беру жүйесінің тірегі, білім қазынасының қара шаңырағы деп атауға толық негіз бар. Оның  себебі, университеттің мыңдаған түлектері Қазақстанның және оның аумағынан тыс жерлердегі өндірістің және биліктің барлық салаларында табысты қызмет атқаруда.

 

Айжан Сәрсенқызы, Экономика және Бизнес Жоғарғы Мектебі, Қаржы кафедрасы э.ғ.к.

Айжан Өтеген, «Қаржы» мамандығының 2-курс магистранты