Республика жаңалықтары

20 Тамыз 2018 17:58
ҚР БҒМ: Астанаға жыл сайын 15 мектеп салынуы керек

Өткен жұмада Астанада Білім және ғылым министрі Ерлан Сағадиевтің қатысуымен ұстаздардың Тамыз конференциясы өткені мәлім. Осы жиында бірші жарты жылдыққа қорытынды жасалды. Министрдің айтуынша, 2016-2019 жылдарға арналған Білім беруді және ғылымды дамыту мемлекеттік бағдарламасын жүзеге асыру бойынша биылғы жылға жалпы, 515 200,5 млн теңге бөлінген болса, 6 айға 218 805,9 млн теңге қарастырылыпты. Оның 99,4% игерілген. Яғни, түгел игерілді деуге толық негіз бар.

Мектепке дейінгі білім беру саласында 3–6 жас аралығындағы балаларда мектепке дейінгі білім берумен қамту көлемі 93,1% құрапты. 2018 жылдан бастап Астана, Алматы және Шымкент қалаларында, сондай-ақ 25 қала мен 6 ауданда (Ақтөбе, ШҚО, БҚО, СҚО, Қарағанды, Павлодар, ОҚО, Маңғыстау) балабақшаларға электронды түрде жолдама беру іске қосылған.

Ал орта білім беру саласында бірқатар жаңалықтар бар. Әсіресе, ұстаздарға қатысты.

«Орта білім беру саласында мына елеулі жағдайды ескере кеткен жөн: жаңартылған мазмұн бойынша сабақ беретін 205 мың (67%) мұғалімнің жалақысы 30%-ға көбейді. Аттестациялауға қатысқан педагогтердің 63% аттестациядан өтті. 2018 жылдың қыркүйек айынан бастап аттестация нәтижесінде санаттарына сәйкес қосымша ақы төленетін болады» - деді министр.

Сондай ақ, білім беру саласы жаңартылған мазмұнға көшіп, бірқатар жаңалықтар енгізілген.

«Жаңартылған мазмұнға көшу жалғасуда. Өткен жылдан бастап 1, 2, 5, 7-ші сыныптар жаңа оқу бағдарламасы, оқулықтар бойынша білім алуда. 2018 оқу жылынан бастап қосымша 3, 6, 8-ші сыныптар жаңартылған мазмұн бойынша оқуға көшеді. Оларға арналған оқулықтар дайын, экспертизадан өтті және оқулықтар облыстарға жеткізіліп жатыр. Барлық өңірлер баспасөзбен кітаптарды жеткізу бойынша келісімшартқа отырды» - деді Е.Сағадиев.

Жыл сайын елімізде 170-ке жуық мектеп пайдалануға беріледі екен. Соған қарамастан үш ауысымда оқитын және апатты жағдайдағы мектептердің проблемасы әлі де толық шешілмеген. Үш ауысымдағы мектептердің болуына демографиялық дүмпу мен және ішкі көші-қон қозғалыстары басты себеп. Мәселен, 2017 жылы Астанаға еліміздің басқа өңірлерінен 80 мыңға жуық адам көшіп келсе, олардың 17 мыңға жуығы балалар екен. Яғни, жыл сайын елордада кемінде 15 жаңа мектеп салынуы керек деген сөз.

Тамыз мәжілісінде техникалық және кәсіптік білім беру мәселесі де сөз болды. Техникалық және кәсіптік білім саласында 824 колледжде 489 мың оқушы дәріс алып жатыр. Бұл оқу орындарында 246 мамандыққа даярланып, 703 мамандық бойынша біліктілікті арттыру жүріп жатыр.  «Баршаға арналған тегін кәсіптік-техникалық білім беру» жобасы іске асырылып жатыр. Ерекше білім беру қажеттілігі бар адамдарға техникалық және кәсіптік білімге еркін қол жеткізу бойынша жол картасының жобасы дайындалып, жұмыстарымыз қолға алынды.

Белгілі бір жұмыс еліміздегі жоғары білім беру жүйесін жетілдіруге бағытталған. Мәселен, ЖОО-лардың академиялық және басқару дербестігін кеңейту туралы Заң қабылданды.

«Жұмыс бәсекеге қабілетті кадрлар дайындауға, білім, ғылым және инновацияны интеграциялауға бағытталған. Назарбаев университетінің тәжірибесі бойынша, ЖОО-лардың академиялық және басқару дербестігі туралы Заң қабылданды. Қазір нормативтік актілер жобалары жалпы дайындалды. Осы 70-тен астам нормативтік актілерді дайындауға жоғары оқу орындары, қауымдастықтар, жұртшылық және мемлекеттік органдар қатысты. 2018–2019 оқу жылына арналған мемлекеттік тапсырыс көлемі 66 389 орынды құрады (бакалавриат – 50 894, магистратура – 13 220, докторантура – 2 275). 65 ЖОО-да қамқоршылық және 28 ЖОО-да бақылау кеңестері бар. Ашық конкурс арқылы 19 ректор тағайындалды. Оқу пәндері 50% білім беру пәнінде, 20% — екінші тілде, 30% — ағылшын тілінде оқытылады. 51 шетелдік ЖОО-мен 310 екі дипломды білім беру бағдарламасы іске асырылып жатыр. Ағылшын тілінде 10 білім беру бағдарламасы енгізілуде» - деді министр.

Әлемнің үздік университеттерінің QS WUR рейтингісіне 2018 жылы 10 қазақстандық ЖОО еніпті. Жалпы білім беру саласында мемлекеттік-жекешелік әріптестік жұмысы оң нәтижелер көрсетіпті.

Д.Жиенқұлов