Республика жаңалықтары

17 Қазан 2018 15:28
Жолдау – жаңа мақсаттарға жетелейтін құжат - сенаторлар

Парламент Сенатының депутаттары Асқар Бейсенбаев пен Әли Бектаев жұмыс бабындағы сапармен Түркістан облысында болды. Сенаторлар Мемлекет басшысының Жолдауын түсіндіру мақсатында Түлкібас және Сайрам аудандарында болып, жергілікті халықпен кездесулер өткізді.

Жүздесулерге аудандық мәслихат депутаттары, ауылдық округтер мен поселке әкімдері, дербес бөлім басшылары, шаруа қожалықтарының төрағалары, қоғамдық ұйымдардың жетекшілері, аудан тұрғындары және білім, денсаулық сақтау салаларының қызметкерлері, бұқаралық ақпарат құралдарының өкілдері қатысты.

Жиын барысында халық қалаулылары Елбасының Қазақстан халқына Жолдауының басым бағыттарына жеке-жеке тоқталып, маңызын түсіндірді.

Сондай-ақ, өңірлік өкілдер  Жолдауда айтылған жаңалықтарды қолдайтындарын жеткізді және осы құжаттың арқасында ел халқының әл-ауқаты жақсарып, болашаққа нық қадам басуға серпін беретінін айтты.

Өз кезегінде  Парламент Сенатының депутаттары Динар Нөкетаева, Төлеубек Мұқашев пен Дулат Құсдәулетов Алматы қаласында жұмыс бабындағы сапарда болды.

Депутаттар Жолдауды  түсіндіру мақсатында Алматы қаласындағы Ішкі істер департаментінің қызметкерлерімен кездесті. Сенаттың Конституциялық заңнама, сот жүйесі және құқық қорғау органдары комитетінің хатшысы Д.Құсдәулетов ішкі істер саласы қызметкерлерінің алдында сөз сөйлеп, Жолдаудың негізгі бағыттарын жан-жақты түсіндірді.

Халықаралық қатынастар, қорғаныс және қауіпсіздік комитетінің хатшысы Т.Мұқашев пен Әлеуметтік-мәдени даму және ғылым комитетінің мүшесі Д.Нөкетаева Парламенттің заң шығару жұмыстары бойынша ауқымды ақпарат берді.

Кездесуде сондай-ақ ішкі істер органдарының қызмет үлгісін өзгерту мәселелері де талқыланды. Елбасының Жолдауында ішкі істер органдарының қызметі бойынша 2019 жылы жол картасын қабылдау туралы тапсырма берілген болатын.

Сенаторлар сонымен қатар Абай атындағы Қазақ ұлттық педагогика университетінің ғалымдары мен профессорлық-оқытушылар қауымымен және студенттерімен кездесіп, Мемлекет басшысының Жолдауын талқылады.

Динар Нөкетаева 90 жылдық тарихы бар Ұлттық білім ордасының рөліне тоқталып, Елбасының Жолдауынан туындайтын міндеттерге қатысты ойларын ортаға салды.

«Президент атап өткендей, 5 жылдың ішінде Ішкі жалпы өнімнің барлық көздерінен білім, ғылым және денсаулық салаларының шығындарын 10 пайызға дейін арттыру қажет. Тұрғындарға қызмет көрсету сапасын едәуір арттыруға бағытталған жоспарлы реформаларды іске асыруға қаржы бағыттау қажет», - деді сенатор.

Жолдауда педагог мәртебесі туралы заң қабылдау қажеттігі айтылды. Д.Нөкетаеваның айтуынша, бұндай бастама Елбасының білім саласына алаңдайтындығын және қолдайтындығын көрсетеді.

Ректор Т.Балықбаев ғалым-оқытушылардың мәртебесін жоғарылату туралы ғылыми тұжырымдамасын әзірлей отырып, өз ұсыныстарын ортаға салды. Сенат депутаты Төлеубек Мұқашев Президент Жолдауы мен «Рухани жаңғыру» бағдарламасының сабақтастығына тоқталды. Бағдарлама ұлттық кодты, атадан қалған рухани байлық пен ұлттық құндылықтарды сақтауды көздейді. Ұлттық сананың жаңғыруы үшін жастар арасында тәрбие жұмысын күшейту қажет.

Сонымен қатар,  Парламент Сенатының депутаты Бақтыбай Шелпеков Маңғыстау облысында жұмыс бабындағы сапарда болды.

 Мұнайлы ауданындағы «Қазақстан теміржолы» ұлттық компаниясының Маңғыстау темір жол бөлімшесі ғимаратында сенатор жұмысшыларымен және басқа да сала өкілдерімен кездесу өткізді.

Кездесу барысында Мемлекет басшысының «Қазақстандықтардың әл-ауқатының өсуі: Табыс пен тұрмыс сапасын арттыру» атты Жолдауында алға қойылған міндеттермен қатар әлеуметтік-экономикалық дамудың барлық салаларында болатын өзгерістер туралы айтылды.

Сондай-ақ білім беру, денсаулық сақтау салалары бойынша Елбасының тапсырмалары мен тұрғын үйдің сапасы және қол жеткізу мүмкіндіктері, басқа да игіліктерді іске асыру үшін барлық қажетті жұмыстар жасалатыны талқыланды.

Сонымен қатар, медициналық-санитарлық көмек көрсететін қызметкерлерді ынталандыру, науқас жандарды емдеу ісін ұйымдастырудағы жаңалықтарды қолдау, учаскелік дәрігерлердің еңбекақысының кезең-кезеңмен көбейтілетіні туралы да айтылды.

Ұстаздарға қатысты «Педагог мәртебесі туралы» заң жобасы әзірленетіні және ол мұғалімдер мен мектепке дейінгі мекемелер қызметкерлері үшін қуанышты жаңалық екені айтылып, мұғалімдерге қойылатын негізсіз жүктемені азайтуға мүмкіндіктер туралы әңгіме болды.

Ал ертеңнен бастап өңірлерге Мәжіліс депутаттары Елбасы Жолдауын түсіндіруге аттанбақ. Себебі, Мәжілістің жалпы отырысында  Спикер Нұрлан Нығматулин  депутаттардың басты мақсаты  өңірлер мен  жергілікті жерлердегі  халыққа  Жолдаудың басты механизмдерін түсіндіру екенін алға тартты.