Республика жаңалықтары

27 Қаңтар 2020 11:28
Елордадағы Корей мәдени орталығында "Сольналь" жаңа жылы тойланды

Корей халқының ай күнтізбесі бойынша қарсы алатын жаңа жыл мерекесін "Сольналь" деп атайды. Оны корейлер жыл сайын 26 қаңтарда тойлайды. Корей мәдениет орталығының директоры Ли Херанның айтуы бойынша, "Сольналь" мерекесі қазақтың жаңажылы "Наурыз" мерекесіне қатты ұқсайды. Олар үшін де "Сольналь" меркесі көктем мерекесі, яғни жаңару мен гүлдену белгісі болып саналады. Сондай-ақ ол кеш барысында орталыққа жиналғандарды жаңа жылмен құттықтап, астананың ызғарлы ауа-райына қарамастан, "Сольналь" мерекесін бірге қарсы алуға келгендері үшін алығысын білдірді. 

"Мен бұл орталықтың басшылық қызметіне 2017 жылы келдім. Бұрынғы басшылардың бұл атаулы мерекені қалай атап өткенінен хабарсызбын. Бірақ мен келгелі жыл сайын атап өтіп келеміз. "Сольналь" корей халқы үшін өте маңызды әрі қадірлі мереке болып саналады. Қазақтар үшін "Наурыз" мерекесі қаншалықты қасиетті әрі маңызды мейрам болса, корейлер үшін "Сольналь" сондай мереке. Ол жаңарудың, гүлденудің белгісі іспетті. Сонымен бірге бүгінгі ауа райының ызғарына қарамастан, біздің жаңа жылды атап өтуге келгендеріңіз үшін алғысым шексіз", - деді орталық дректоры. 

photo5294542637346434203.jpg
"Сольналь" мерекесін тойлауға мәдени орталыққа 400-ге жуық астаналық келді. Жиналғандарға корей қлттық тағамының қалай жасалатыны жөнінде таныстырылым өтті. Сондай-ақ орталық басшысы оның отбасылық мереке екендігін атап өтті. 

Сонымен бірге кеш барысында қонақтар мерекеге орай ұйымдастырылған концертті тамалашап, корей ұлттық тағамы "токкуктен" дәм татты. Сондай-ақ корей салт-дәстүрі бойынша әулеттің үлкендеріне қалай тағзым ету керек деген бағытта шеберлік-сағаттары өтті. 

IMG_5648.JPG
"Бүгін корей жаңа жылын атап өтуге 400-ге жуық адам келді. Өткен жылы 300-ге жуық адам келген болатын. Жыл өткен сайын біздің мәдениетімізге, тіліміз бен салт-дәстүрімізге деген қызығушылықтың артуы - бізді қуантады. Мен, әрине келушілер санының артқанын қалаймын. Көпшілігі достарынан, таныстарынан естіп келеді. Бұл күні корей халқы таңмен таласып оянып, дайындық жасайды. Жаңа киім киеді әрі салт дәстүр бойынша жастар әулеттің үлкендеріне амандасады. Сондай-ақ үйдің үлкен-кішісі, алыстағы отбасы мүшелері бәрі үйге жиналып, токкук ұлттық тағамынан дәм татады. Бұл тағам тек "Сольнальда" ғана дайындалады. Қазақтың "Наурыз көжесі" іспетті. Қазақстандағы корейлер елінен жырақта жүрсе де, ұлттық жаңа жылын атап өтуге тырысады", - деді  Ли Херан.

Сондай-ақ орталық директорының айтуы бойынша, жаңа жыл кезінде корей халқы үш күн демалады. Егер де мереке күні сенбі не жексенбімен қатар келсе, онда бес күнге дейін демалыс беріледі. 

Сонымен қатар орталық басшысы корей халқы жаңа жыл қарсаңында қазақтар секілді бірқатар ырым-тыйымдарды ұстанатынын атап өтті. 

photo5294094259940600818.jpg
"Жаңа жылды қалай қарсы алу керек деген бағытта түрлі аңыздар мен ырымдар бар. Оны ұстану міндетті емес, дегенмен ежелгі корей халқы оларды ұстанып келеді. Жаңа жыл күні түнде халық ұйықтамайды не болмаса кеш жатады. Себебі жаңа жыл түні ерте ұйықтап қалсаң, қасың ағарып кетеді деген тәмсіл бар. Әрине, күлкілі естіледі. Дегенмен, жоғарыда айтып өткендей жаңа жылды қарсы алушылар ұйықтамау керек. Сол үшін осылай деп айтылады. Мәселен, кішкентай балалар шаршап, ұйықтап қалуы мүмкін. Бір отбасы болып мерекені қарсы алып, уақытты көңілді өткізу үшін балалардың да қатысқаны керек. Сол себепті оларға "ұйықтасаң, қасың қарайып кетеді" деп айтады", - деп күлді орталық басшысы.

Сонымен қатар оның айтуынша, "Сольналь" отбасылық мереке. Сол себепті жаңа жыл жақындағанда бәрі үйлеріне қайта бастадйы.

"Жаңа жыл қарсаңында алыста жүрген отбасы мүшелері қара шаңыраққа жетуге тырысады. Себебі бұл - отбасылық мереке. Бәрі жақындарының ортасында қарсы алуға асық болады. Сондай-ақ тағы бір айта кету керек дүние, жаңа жыл кезінде тұрғындар терезеге сито іледі. Ол жын-шайтаннан қорғайды деген деген тәмсіл бар корей халқында. Енді неге терезеге іледі дегенге тоқталсам, жын-шайтан терезеге үңілген кезде ситодағы тесіктерді көріп, оларды санайды. Санап отырып, не үшін келгенін ұмытып қалады дейді ата-бабамыз. Міне, осындай қызық ырым бар. Бұл өз кезегінде үйді, тұрғындарды жын-шайтаннан көрғайды деп сенген", - дейді орталық басшысы.

Сондай-ақ орталық басшысының айтуынша, жаңа жыл қарсаңында отбасы мүшелері бір-біріне сыйлық сылайды. Ал балалар өз кезегінде сыйлық орнына ақша алғанды құп көреді екен. Сонымен қатар ол өз сөзінде корей ұлттық киімінің ерекшелігін тілге тиек етті. 

IMG_5903.JPG "Сольналь" қарсаңында отбасы мүшелері бір-біріне әртүрлі сыйлық жасайды. Соның ішінде ата-аналар жыл сайын балаларынан жаңа жылға не қалайтындарын сұрайды. Олардың көпшілігі сыйлық ретінде ақшаны таңдайды. Сондай-ақ жоғарыда айтып өткендей, жастар әулеттің үлкендеріне тағзым етіп, құрмет көрсетеді. Сөйтіп олар үйдің ересектерінен сыйлық ретінде ақша дәметеді. Бүгін көгендеріңіздей, біз кішкентай дорбашамен сыйлық тараттық. Бұрындары корейлердің ұлттық киімі конбокта қалта болмаған. Сол себепті осындай кішкентай қорапшаларды ақша салу үшін тұрғындар өздерімен бірге алып жүрген. Бұл дәстүр негізінен жыл бойы қаражат жағынан қысылмасын, ылғи ақшаға бай болып жүрсін деген ырыммен жасалған", - деді ол.  

Сөз соңында Ли Херан орталықтың  құрылғанына биыл 10 жыл толатынын айтып кетті. Оның айтуынша, орталықтың он жылдығына орай бірқатар іс-шара өткізуді жоспарланған. Сол себепті, оның сөзіне сенсек, 2020 жылы өткізілетін шаралар бқрынғыдан өзгеше болмақ.

"Біз бірқатар іс-шара өткізуді жоспарлап отырмыз. Оның қатарында корей мәдниетімен таныстыратын көрмелер, ұлттық музыка, ән шырқалатын концерттер, сондай-ақ түрлі кездесулер ұйымдастыру бар. Мәселен, Тұңғыш президент музейінде көрме өткізу жоспарда бар. Көрмеде корей халқы түстеді қалай қолданды деген сқраққа жауап табуға болады. Сонымен қатар Назарбаев орталығында да "Медиа және өнер" атты көрме ұйымдастырмақпыз. Сонымен бірге корей ұлттық өнерін таныстыру мақсатында да көрме өткіземіз. Сондай-ақ K-pop жанрында фестиваль ұйымдастырамыз. Онда осы салада жүрген қазақстандық жастар бәсекеге түспек. Конкурстың жеңімпаздары Қазақстанды Кореяда таныстырады", - деп аяқтады ол сөзін. 

Айта кетейік, Корей мәдни орталығы 2010 жылы 4 наурызда құрылған болатын. Орталықтың мақсаты - қазақстандықтарды корей мәдениетімен, тілімен, салт-дәстүрімен және басқа да ерекшеліктерімен таныстыру. Құрылғалы бері орталық өкілдері тіл үйрету курстары, мәдениетін таныстыру бағытында түрлі іс-шаралар өткізіп келеді.

Назерке Сүйіндік